夜談

訪問一間咖啡館，因為它開到凌晨三點，做一個飲食feature的通常都是由開鋪到收鋪，看它的流水作業。接近凌晨兩點，我走進廚房，只剩一個男子在那裏切菜，很直接地跟他談起來。他先是怔了一怔，大概是因為我闖進去，又忽然發問。

一談之下，又是一個有故事的人。

「呢份係我第二份工，平日日頭有另一份。呢份由下午四點做到兩點。」他笑說，露出兩個淺淺的梨窩，「嗰份送貨，送啲廚房嘢。檸檬，菜啊。咁樣一份訪問，收幾多錢？」

「唔使錢，純粹係做個專題報導，我哋有故仔出，佢又有廣告效應。」

他「哦」了一聲，「其實我都係一盤生意。呢啲廚房原材料嘅拆家。自己開，兩年到，其實都唔使點做，我攞啲單，叫貨車司機送貨，再分帳。本來係屋企人做開，接手來做。但之後因為錢銀瓜葛，我俾返晒佢哋，費事煩。之後都開咗餐廳，儲咗點錢，再自己開。」

「我十八歲已經開始幫手做，廿歲嗰陣，佢哋已全權交俾我做。接手之後，先發現中伏，盤數唔係佢哋講得咁好，唔係蝕錢，但打和，即係白做，每個月都白做，條氣唔順。咁咪諗吓點樣可以做得更好。好不容易生意開始賺錢，屋企人開始問我攞錢。因為我阿媽信藏傳佛教，成日要去西藏，印度朝聖，要錢，佢就問我攞。大佬，我心雄，想擴大盤生意來做，但佢竟然要使係呢啲地方，仲出動我嬤嬤，佢係外國，凌晨打電話來同我傾，咁已知道佢哋係佢面前講咗啲嘢。大家嘈咗好多次，咁咪俾返佢哋。但我哋一齊食飯嗰陣又好好，只要唔講生意，大家都非常和睦。」

「之後，出來打工，再開餐廳，儲咗點錢，再做返原料買賣。試過俾美心、大家樂，去到月尾埋數，佢話要打個九折、八折。你無辦法，唯有俾佢壓價。最後學精，訂價訂得高點，俾佢殺價，都唔使咁蝕。」

「一開始都蝕咗好多，試過欠人錢成六位數字，之後慢慢先還清。」

「啲原材料都俾人炒起晒，因為買嘅都係期貨，俾啲有錢人炒高晒。好彩嘅，你搵到個好供應商，可以攞到平貨。 」

「咦，咖啡好唔好賺？ 遲啲都想開返間，因為我覺得無聊，夜晚無野做，又無乜嗜好，朋友又唔會話約出來玩。而家做廚房呢份工，因為想學埋佢點整啲小食。趁後生，有精力，要搏趁早。」

「嗰店主26歲，我同佢同年。」他又笑了，再補一句：「我做幕後，唔想出鏡。成哥（廚房的另一位廚師）知道我嘅背景，因為送貨來，點都會知。頭先講嗰啲，大家吹下水，吹完就算。」談完，他繼續做手上的活。

後來，穿起外套的他一個人離開，擦身而過時，跟我說了聲BYE， 我回應時，走在前頭的他再回頭揮手。

26歲，是怎樣的一個年齡，四分之一個世紀，經歷了不同的生離死別，不同的愛恨情愁，可以很他媽的幼稚，亦可以是很他媽的飽經風霜。無論如何，這位26歲想逃避寂寞而一天做兩份工的半熟男孩留在我的腦海。